بھارت: مشتبہ مریض قرنطینہ سے فرار، چھپنے کیلئے اسپتال کی چھت پر چڑھ گیا

نئی دہلی: بھارت میں کروناوائرس کا مشتبہ مریض قرنطینہ سے فرار ہوکر چھپنے کے لیے اسپتال کی چھت پر چڑھ گیا، پولیس نے نوجوان کو بحفاظت نیچے اتار لیا۔

غیرملکی خبررساں ادارے کی رپورٹ کے مطابق یہ واقعہ بھارت کے شہر جے پور میں پیش آیا۔ مذکورہ نوجوان نے اسپتال کے قرنطینہ سے راہ فرار اختیار کی اور پارکنگ ایریا کی چھت پر چڑھ گیا۔

بعد ازاں پولیس جائے وقوعہ پر پہنچی اور مریض کو بحفاظت چھت سے نیچے اتارا۔ ’’ایس ایم ایس‘‘ اسپتال میں یہ اپنی نوعیت کا منفرد واقعہ پیش آیا۔ مذکورہ مریض کو کرونا علامات ظاہر ہونے پر قرنطینہ میں رکھا گیا ہے۔

نوجوان کا کرونا ٹیسٹ کیا جاچکا ہے تاہم رپورٹ تاحال سامنے نہیں آئی۔ مذکورہ شہری کی قرنطینہ سے فرار ہونے کی وجہ بھی سامنے نہیں آئی۔ متعلقہ اداروں نے تحقیقات کا آغاز کردیا ہے۔