متحدہ امارات کا بھی پاکستان کیلئے خصوصی پرواز چلانے کا اعلان

اسلام آباد: عمان کے بعد متحدہ عرب امارات حکومت نے بھی پاکستان کے لیے خصوصی پرواز چلانے کا اعلان کر دیا۔

تفصیلات کے مطابق سول ایوی ایشن اتھارٹی نے فلائی دبئی کو پرواز چلانے کی اجازت دے دی، فلائی دبئی کی پرواز کل دبئی سے فیصل آباد کے درمیان چلائی جائی جائے گی۔

خصوصی پرواز کے ذریعے دبئی میں پھنسے 180 پاکستانیوں کو فیصل آباد لایا جائے گا، واپسی پر اسی پرواز میں 11 اماراتی سفارت کاروں کو واپس لے جایا جائے گا۔

پرواز کے فیصل آباد پر اترنے پر کریو کو طیارے سے اترنے کی اجازت نہیں ہوگی جب کہ ائیرلائن خود طیارے کو جراثیم سے پاک کرے گی۔

اس سے قبل سول ایوی ایشن اتھارٹی نے سلام ائیر کو خصوصی پروازیں چلانے کیلئے اجازت نا مہ جاری کیا، خصوصی پرواز 16 اور 17 اپریل کو مسقط سے لاہور اور کراچی کے درمیان آپریٹ کی جائیں گی۔

سی اے اے کے مطابق خصوصی پروازوں میں عمان میں پھنسے پاکستانیوں کو لاہور اور کراچی پہنچایا جائے گا۔
واپسی پر خصوصی پروازوں میں عمانی شہریوں کو واپس لے جایا جائے گا، پروازوں کے پاکستانی ائیرپورٹس پر اترنے پر کریو کو جہاز سے اترنے کی اجازت نہیں ہوگی۔

لاہور اور کراچی آمد پر ائیرلائن خود جہازوں کو جراثیم سے پاک کرے گی۔